Ry Havana malala,

Mamangy sy miarahaba anareo ao amin’ny Tompo Jesoa Kristy.

SAOTRA, DERA, LAZA no atolotra ho an’Andriamanitra fa Asa mivantana avy amin’ny Fanahy Masina no nahazoan’ny Fiangonana FPMA GRENOBLE Mpitandrina matihanina, ary Fahasoavan’Andriamanitra azo notsapain-tanana ny nahatanteraka omaly Alahady 19 Feb 2012 ny “Fametrahana ofisialy ny Mpitandrina matihanina Jean Teddy RAMAHERIJAONA”, “Fanokanana sy fametrahana ireo Diakona sy mpiandraikitra Sampana ary Vaomiera FPMA Grenoble”. Voninahitra ho an’Andriamanitra, ary hamiratra any ampontsika sy any ampon’ny olona rehetra anie ny anarany masina!

FISAORANA feno no atolotra anareo Ray amandreny Mpitandrina nanatanteraka izany fotoan-dehibe eo amin’ny tantaran’ny Fiangonana izany. Mankasitraka ny Pastera Synodaly Jean RAVALITERA Filohan’ny FPMA, Pastera Jeannot RANDRIANANDRASANA Mpandrindra ny Faritany, Pastera Falimanana RAHARINDRANTO Mpikambana Birao Foibe FPMA, Mpitandrina mpandrindra FPMA GRENOBLE teo aloha, Pastera Theodore RANDRIAMANANTENA Filohan’ny FMM Fiaraha-Miasa’ny-Mpitandrina FPMA. Manana Ray aman-dreny tokoa ny fiangonana!

FISAORANA lalim-paka no atolotra anareo rehetra tsy ankanavaka niara-nivavaka, na ny tonga nanatrika ara-batana, na ny nanatrika mivantana tamin’ny tranonkala (web internet) ; na ny avy eto an-toerana na ny vahiny rehetra samy tonga maro be. Tsaroana manokana ny Filoha sy ny Birao Faritany atsimo atsinanana ary ireo Filoha sy solontena Tafo rehetra ao aminy, tonga maro be. Tsaroana indrindra ihany koa ireo solontena vondrom-piangonana sy solontenam-piangonana rahavavy rehetra, na malagasy na vazaha, tonga maro be.

FANKASITRAHANA feno no atolotra anareo nikely aina rehetra tamin’ny fandraisana anjara tandrify azy avy, na ny lavitra na ny akaiky. Hamaly fitia anareo anie ny Tompo, araka ny teniny, “Fa Andriamanitra tsy mba tsy marina hanadino ny asanareo sy ny fitiavana izay nasehonareo ho voninahitry ny anarany…” Heb 6:10

Mampahery anareo ao amin’ny Tompo izahay, koa mizara ho anareo izao teniny izao,

“Fa izay miandry an’i Jehovah  dia mandroso hery kosa ;

Elatra no hiakarany tahaka ny voromahery ;

hihazakazaka izy, nefa tsy ho sasatra ; handeha izy nefa tsy ho reraka”.

Isaia 40:31

Ny voninahitra ho an’Andriamanitra irery ihany!

Amin’ny anaran’ny Tafo FPMA GRENOBLE,

Ny Mpitandrina,                                                                  Ny Filoha,

Jean Teddy RAMAHERIJAONA                                          Jean-Solo RAFIDINARIVO